XƏBƏR
20:58

  43-cü sessiya çərçivəsində Azərbaycanla Bolqarıstan mədəni əməkdaşlığa dair proqram sənədi imzalayıb

Gündəm

Xəbər lenti

Azərbaycanla Bolqarıstan arasında mədəni əməkdaşlığa dair proqram sənədi imzalanıb.

 

Agyol.az xəbər verir ki, iyulun 4-də mədəniyyət naziri Əbülfəs Qarayev UNESCO-nun Ümumdünya İrs Komitəsinin 43-cü sessiyasında iştirak etmək üçün ölkəmizdə səfərdə olan Bolqarıstan Respublikasının Mədəniyyət naziri Boil Banov ilə görüşdü.

 

Görüşdə Əbülfəs Qarayev qonağa ölkəmizin ev sahibliyi etdiyi beynəlxalq tədbirlər və Azərbaycanın zəngin mədəni irsi haqqında geniş məlumat verdi. Bildirdi ki, mədəniyyət sahəsinin hərtərəfli inkişafı və dünyada təbliği istiqamətdə mühüm işlər görülür. Azərbaycan dövləti bu istiqamətdə həyata keçirilən layihələrə böyük diqqət göstərir, dəstək verir. Ölkəmiz mədəniyyət sahəsində beynəlxalq əlaqələrin daha da inkişafında maraqlıdır.

 

Nazir həmçinin Azərbaycanla Bolqarıstan arasındakı münasibətlərə toxunaraq qeyd etdi ki, iki ölkə arasında bütün sahələrdə yaxşı əməkdaşlıq mühiti mövcuddur. Bu mühitin daha da inkişaf etdirilməsində Azərbaycan tərəfi əlindən gələni edəcək.

 

Bolqarıstan Respublikasının Mədəniyyət naziri Boil Banov ölkəmizdə ilk dəfə olduğunu bildirdi, Azərbaycanın zəngin mədəniyyətə malik bir ölkə kimi səciyyələndirdi: “Bunun əyani sübutu kimi Azərbaycanın UNESKO-nun Ümumdünya İrs Komitəsinin 43-cü sessiyasına yüksək səviyyədə ev sahibliyi etməsi və göstərdiyi yüksək qonaqpərvərliyi qeyd edə bilərəm”.

 

İki ölkə arasındakı əlaqələrin inkişafından danışan bolqarıstanlı nazir Azərbaycanla mədəniyyət sahəsində daha sıx münasibətlərin qurulmasına, qarşılıqlı səfərlərin təşkil olunmasında maraqlı olduqlarını diqqətə çatdırdı.

 

Daha sonra iki ölkənin mədəniyyət nazirlikləri arasında 2019-2023-cü illər üzrə mədəniyyət sahəsində əməkdaşlıq haqqında proqram sənədi imzalandı.

 




  Yayım tarixi :04 Iyul 2019   20:58

 





Xəbərə aid heç bir video mövcud deyil



Ⓒ AĞYOL 2019 - Bütün hüquqlar qorunur .